Vika símenntunar haldin í annað sinn
Vika símenntunar, sem haldin er á vegum menntamála-ráðuneytisins, verður haldin í annað sinn hér á landi dagana 3.-9. september nk., og sér MENNT um skipulagningu og framkvæmd vikunnar í samvinnu við símenntunarmiðstöðvar víða um land. Þema Viku símenntunar að þessu sinni verður Ísland og umheimurinn - tungumál og tölvukunnátta. Markhópur hennar eru allir þeir sem vilja bæta við sig þekkingu í tungumálum og tölvukunnáttu hvort sem hún á að nýtast í atvinnulífinu, tómstundum, á ferðalögum eða í samskiptum almennt. Auk þess verður lögð áhersla á almenna hvatningu og kynningu á mikilvægi símenntunar. Í nútíma samfélagi upplýsinga-, fjarskipta- og stafrænna tækja þar sem örar tækniframfarir og alþjóðavæðing efnahagslífsins á sér stað verður sífellt mikilvægara fyrir fyrirtæki og starfsmenn þeirra að halda við menntun sinni og þekkingu til að vera samkeppnishæf á markaði.
Málþing á Hótel Loftleiðum 5. september 2001
Einn liður í Viku símenntunar verður málþing sem ber
yfirskriftina "Ísland og umheimurinn - tungumál og
tölvukunnátta" Hver er framtíðin - hvert stefnir?
Meðal fyrirlesara verða, auk Björns Bjarnasonar
menntamálaráðherra: Páll Kr. Pálsson forstjóri 3p Fjárhús, Eyþór
Eðvarðsson IMG, Guðrún Magnúsdóttir forstjóri ESTeam AB, Arthúr
Björgvin Bollason Sögusetrinu á Hvolsvelli og Þorsteinn Gunnarsson
rektor Háskólans á Akureyri.
Frekari upplýsingar um Símenntunardaginn 6. september, fræðsluhátíð í Kringlunni 8. september og margt fleira er að finna á vefsíðu Viku símenntunar.
