Stjórnendur hækkuðu minnst starfsstétta árið 2015
Á árinu 2015, milli þriðja ársfjórðungs 2014 og sama ársfjórðungs 2015, hækkuðu stjórnendur og sérfræðingar minnst allra starfsstétta, eða um liðlega 5%. Meðalhækkunin launavísitölunnar var rúmlega 8%, en verkafólk hækkaði mest, um 11%, og afgreiðslu- og þjónustufólk næst mest, um rúm 10%.
Fréttablaðið birtir í dag frétt um árstekjur 15 forstjóra félaga í Kauphöllinni árið 2015 og samanburð við árið 2014. Niðurstaða blaðsins er að árstekjur þeirra hjá fyrirtækjunum hafi að meðaltali hækkað um 13,3% og hafi hækkanir verið á bilinu 2% til 46%. Á þessum hækkunum eru eflaust margvíslegar skýringar en líklegast er að miklum sveiflum í tekjum forstjóranna valdi óreglulegar og afkomutengdar greiðslur. Slíkar greiðslur geta ýmist hafa fallið niður milli ára, verið óbreyttar, breyst til hækkunar eða lækkunar eða greiddar á síðara árinu en ekki því fyrra. Þá eru dæmi um að afkomutengdar greiðslur séu greiddar út á tilteknu ári vegna árangurs fleiri en eins árs.
Hagstofa Íslands birtir upplýsingar um launaþróun í formi launavísitalna. Aðferð hennar er að bera saman laun sömu einstaklinga í sömu störfum hjá sömu fyrirtækjum milli tveggja tímabila við mat á launabreytingum. Þegar launavísitölur hópa eru reiknaðar út er byggt á launahugtakinu regluleg laun, en það eru föst laun sem greidd eru við hverja launaútborgun. Ekki er byggt á greiðslum fyrir yfirvinnu eða öðrum óreglulegum greiðslum. Hagstofan hefur birt launavísitölur fyrir starfsstéttir frá árinu 2005 og eru nýjustu upplýsingar frá þriðja ársfjórðungi 2015.
Niðurstaða Hagstofunnar er að regluleg laun á almennum vinnumarkaði hafi hækkað að meðaltali um 102% frá árinu 2005 til þriðja ársfjórðungs 2015. Mest hækkaði skrifstofufólk, um 123%, þá verkafólk og afgreiðslufólk, um 115%, en stjórnendur hækkuðu minnst, um 78%, og sérfræðingar næst minnst, um 85%.
