Opinber útboð auka hagvöxt
Svenskt Näringsliv, samtök atvinnulífsins í Svíþjóð, hafa sent frá sér skýrslu um áhrif útboða á þjónustu sveitarfélaga. Fram kemur að hlutfall þjónustu sveitarfélaganna sem innt er af hendi af einkaaðilum jókst úr um 2,2% árið 1990 í um 6,4% árið 1999, að jafnaði. Verulegur munur er þó á milli sveitarfélaga, en hlutur einkaaðila er allt frá tveimur prósentum í tíu. Samkvæmt niðurstöðum skýrslunnar eru veruleg jákvæð tengsl á milli svæðisbundins hagvaxtar annars vegar og þess hlutfalls opinberrar þjónustu sem framkvæmd er af einkaaðilum hins vegar. Þó er tekið fram að tengslin sanni ekki orsakasamband, en auk meiri svæðisbundinnar framleiðslu virðast opinber útboð stuðla að fjölgun fyrirtækja og aukningu í samkeppni, nýsköpun og kostnaðarvitund.
Sveitarstjórnarmenn jákvæðir
Jafnframt eru í skýrslunni birtar niðurstöður skoðanakönnunar sem
framkvæmd var meðal sænskra sveitarstjórnarmanna. Mikill meirihluti
þeirra reyndist telja útboð opinberrar þjónustu til einkaaðila
stuðla að auknum hagvexti, og athygli vekur að svo var um fulltrúa
allra stjórnmálaflokka.
Sjá skýrsluna á heimasíðu sænsku samtakanna (pdf-snið).
