Nýr kjarasamningur SA og Félags lykilmanna
Samtök atvinnulífsins og Félag lykilmanna (FLM) hafa undirritað nýjan kjarasamning. Um er að ræða fyrsta kjarasamninginn sem SA og FLM gera sín á milli og er hann gerður í ljósi mikillar fjölgunar sérfræðinga og stjórnenda sem kosið hafa að eiga aðild að FLM.
Kjarasamningurinn nær til sérfræðinga og stjórnenda sem aðild eiga að FLM og samið hafa í ráðningarsamningi við sinn atvinnurekanda um að kjarasamningurinn verði lagður til grundvallar ráðningarsambandi aðila. Samningurinn er áþekkur kjarasamningum sem SA hafa gert við stéttarfélög háskólamanna og byggir á þeirri grunnforsendu að sérfræðingar og stjórnendur semja persónubundið um laun sín og önnur starfskjör.
Á vinnumarkaðsvef SA má nálgast kjarasamninginn og kynningu á ákvæðum hans.
