Leitað verði orsaka mismunandi matvælaverðs
Samtök atvinnulífsins taka í umsögn undir tillögu til þingsályktunar þess efnis að ríkisstjórninni verði falið að leita orsaka fyrir mismunandi matvælaverði á Norðurlöndum og í Evrópusambandinu. Samtökin telja að slík athugun geti leitt mikilvægar upplýsingar í ljós og leiðrétt misskilning sem borið hefur á í almennum umræðum um samanburð á almennu verðlagi og þróun þess hérlendis og í nágrannalöndum. Áhersla er jafnframt lögð á að miklar kröfur verður að gera um vinnubrögð og faglegan grunn í slíkri athugun.
Skyld tillaga vekur nokkra furðu
SA telja hins vegar skylda tillögu til þingsályktunar vekja nokkra
furðu, en þar óska sömu flutningsmenn eftir að Alþingi álykti að
fela ráðherra Hagstofu Íslands að láta bera saman reglulega
matvælaverð á Íslandi við matvælaverð á Norðurlöndum og í
Evrópusambandinu. Samanburðinn skal samkvæmt tillögunni birta
ársfjórðungslega. Í umsögn vekja SA athygli á því að umrædd erlend
samanburðargögn eru ekki birt opinberlega af hagstofum einstakra
Evrópuríkja og að upplýsingar Eurostat eru byggðar á könnunum sem
gerðar eru þriðja hvert ár og svo framreiknaðar. Til þess að
Hagstofa Íslands ætti að geta framkvæmt efni tillögunnar þá þyrfti
hún því sjálf að afla gagna ársfjórðungslega um vöruverð í
samanburðarlöndunum, sem ekki getur verið tilgangur tillögunnar að
mati SA.
Sjá tillögu til þingsályktunar, 3. mál og umsögn SA (pdf-skjal)
Sjá tillögu til þingsályktunar, 7. mál og umsögn SA (pdf-skjal)
