Enginn vorboði þetta árið
Það hefur verið gaman að fylgjast með lífinu lifna við á landinu á vorin síðustu árin. Vorboðinn ljúfi, ferðamennirnir, hafa svo sannarlega glætt mannlífið hér. Fyrir utan öll störfin sem þau hafa skapað þá hefur aukinn fjöldi þeirra leitt til þess að hægt hefur verið að fjárfesta í mun fjölbreyttari veitingastöðum, afþreyingu, ferðamannastöðum og gistingu. Þær fjárfestingar hafa líka nýst okkur vel sem erum hérna allt árið.
Þótt það stefni í að Íslendingar verði duglegir að ferðast innanlands í sumar þá er ljóst að það er langur vegur í að það geti komið í stað tekna af ferðamönnum. Ekkert annað land á Vesturlöndum er hlutfallslega jafn háð ferðamennsku eins og Ísland.
Það er lítið annað hægt að gera en að gefa þeim fyrirtækjum, sem eru lífvænleg til lengri tíma, kost á því að leggjast í híði. Með því er best tryggt að auðvelt verði að setja í gang aftur og fara í öflugt markaðsátak þegar ferðalög hefjast í okkar heimshluta. Dæmin sanna að ef fyrirtæki fara í þrot þá getur tekið langan tíma að koma sambærilegri starfsemi af stað aftur. Þannig voru arftakar Wow air t.d. ekki komnir af stað áður en kórónakreppan skall á þótt það væri tæpt ár liðið frá gjaldþroti Wow.
Það gerist nefnilega ekkert af sjálfu sér í viðskiptum. Það þarf að standa vörð um fjárfestingar, hugvit og önnur verðmæti svo við getum fengið vorboðann til að koma hingað, og tekið vel á móti honum, næst þegar færi gefst.
Davíð Þorláksson er forstöðumaður samkeppnishæfnissviðs Samtaka atvinnulífsins. Greinin birtist í Fréttablaðinu í dag.
