Dönsk sveitarfélög geta sparað milljarða með auknum útboðum
Forsvarsmenn danskra sveitarfélaga hafa að undanförnu gagnrýnt ríkisstjórnina fyrir að þeim sé skapaður þröngur fjárhagsrammi og takist því ekki að ná jafnvægi í fjárhagsáætlunum fyrir næsta ár. Nýir útreikningar dönsku samtaka iðnaðarins (DI) sýna á hinn bóginn að sveitarfélögin þurfa ekki nauðsynlega að skera niður þjónustu til þess að geta náð jöfnuði í fjárhag sínum á næstu árum. Með því einu að auka útboð á verkefnum til einkaaðila gætu sveitarfélög lækkað verulega útgjöld og brúað bilið í fjárhag sínum. Ríkisstjórnin hefur sömuleiðis svarað gagnrýninni með því að benda á að sveitarfélög geti bætt árangur með auknum útboðum.
Náið er fylgst með þróun opinberra útboða í Danmörku og birtir danska hagstofan árlega tölur um verkefni sveitarfélaga sem boðin eru út sem hlutfall af heildarútgjöldum. Allt frá árinu 2000 hefur útboðshlutfall sveitarfélaganna í heild lítið breyst og oftast verið um 11,9% af útgjöldum. Mikill munur er þó á þessu hlutfalli eftir sveitarfélögum. Í þeim fimm sveitarfélögum sem mest buðu út árið 2005 var hlutfallið 25,7%, en hjá þeim fimm sem minnst buðu út var hlutfallið 8,1%.
DI hefur á grundvelli opinberra gagna reiknað út hve mikið mætti spara í útgjöldum sveitarfélaga með því að þau sveitarfélög sem eru með útboðshlutfall undir meðaltali auki útboð og hækki sig upp í meðaltalið. Niðurstaðan er sú að miðað við árið 2005 gætu sveitarfélögin með þessu móti sparað hátt í 2 milljarða danskra króna (23,9 milljarða ísl. króna).
